राप्रपामा प्रदेश विवाद: पदमुक्तिसम्बन्धी पत्रको वैधानिकतामाथि प्रश्न

बागमती प्रदेश सरकारमा सहभागी भएका सांसदलाई गरिएको कारबाहीलाई लिएर राष्ट्रिय प्रजातन्त्र पार्टी (राप्रपा)भित्र विवाद चर्किएको छ। पार्टीको केन्द्रीय नेतृत्वले चार प्रदेशसभा सदस्यलाई पदमुक्त गर्न पठाएको पत्रप्रति राप्रपा बागमती प्रदेश कार्यसमितिले आपत्ति जनाउँदै उक्त निर्णय कार्यान्वयन नगर्न प्रदेशसभा सचिवालयलाई आग्रह गरेको छ।

बागमती प्रदेश कार्यसमितिका अध्यक्ष विक्रम थापाले प्रदेशसभा सचिवालयमा दर्ता गराएको पत्रमा केन्द्रीय नेतृत्वको कारबाही संविधान, पार्टी विधान र संसदीय दलको नियमावलीअनुकूल नरहेको दाबी गरिएको छ। पत्रमा केन्द्रीय कार्यसम्पादन समितिको बैठक नै नबसेको अवस्थामा निर्णय भएको भन्दै पदमुक्तिसम्बन्धी पत्रको वैधानिकतामाथि प्रश्न उठाइएको छ।