पूर्वाधार विस्तार, उडान कटौती

नेपालगन्ज विमानस्थल कार्यालयले दुई महिनादेखि सुविधासम्पन्न टर्मिनल भवनबाट आफ्नो सेवा दिइरहेको छ। गत वैशाख १५ बाट सञ्चालनमा आएको अन्तर्राष्ट्रिय मापदण्डको टर्मिनल भवन अन्डर–ग्राउन्डसहित ५५ हजार स्क्वायर फिटमा तीन तलाको रहेको छ। टर्मिनल भवनका तीनवटा ब्लकसहित जहाज पार्किङ क्षेत्र, सवारी साधन पार्किङ, गेस्टहाउस, ढल व्यवस्थापन, बगैंचा, फुटपाथ, शौचालयलगायतका संरचना निर्माण गर्न मूल्य अभिवृद्धि कर (भ्याट) बाहेक दुई अर्ब ७२ करोड रुपैयाँ खर्च भएको थियो।

एकैपटक ६ सय ९८ जना बस्न मिल्ने क्षमता रहेको उक्त टर्मिनल भवनमा यतिबेला यात्रु खचाखच भरिनुपर्ने हो, तर भवनको क्षमताअनुसार यात्रुको उपस्थिति निकै कम हुन्छ। नेपाल नागरिक उड्डयन प्राधिकरणले यहाँ निर्मित दशकौं पुराना संरचनालाई विस्थापित गरी नयाँ पूर्वाधार बनायो तर यही समयमा विमान कम्पनीले आफ्नो उडान (फ्लाइट) मा भारी मात्रामा कटौती गरे। टर्मिनल भवनको क्षमताअनुसार यात्रुको संख्या कम हुँदा खल्लो महसुस भइरहेको विमानस्थल कार्यालयकै कर्मचारी बताउँछन्। ‘अहिले विमानस्थलको टर्मिनल भवन ठुलो क्षमतामा रहेको छ, तर यही बेलामा हवाई कम्पनीले फ्लाइट कटौती गरेका छन्, यात्रुको चाप पनि कम छ’, ती कर्मचारीले भने।