कुरुमकुरुम आलु निम्की

सुनकोसीको किनारामा रहेको रानीटारमा गाडी रोकियो। ‘आजकाल सुनकोसीमा फेरी चलेको छैन, हिँडेर जानुपर्छ, साँघु तरेपछि अर्को गाडी लागेको हुन्छ, त्यसैमा जानु,’ गाडीका कर्मचारीले आदेश दिएका थिए।

चतराभन्दा तीन किलोमिटर पश्चिम उदयपुरको बेलका नगरपालिकामा रहेको लाहुरेको खोज रिसोर्टबाट बिहानै हिँडेका थियौँ यस गाडीमा। सप्तकोसीको किनाराबाट पक्की कच्ची सडकमा कुदाउँदै ल्याएर गाडीले सुनकोसीको किनारामा छोडेको हो। यो सानो बजार रानीटार चाहिँ उदयपुरकै चौदण्डीगढी नगरपालिकामा पर्छ। पारि भोजपुर, आमचोक गाउँपालिका। पुग्नु पर्ने त्यही पालिका हो तर हाम्रो गन्तव्य त पालिकाको केन्द्र बालंखा थियो।