साउन महिनाका लागि पशुपति क्षेत्रमा विशेष सफाइ अभियान

काठमाडौँ । साउन महिनामा आराध्यदेव भगवान् पशुपतिनाथको पूजाआराधना एवं दर्शनका लागि आउने लाखौँ भक्तजनको सहजतालाई ध्यानमा राख्दै पशुपति क्षेत्रमा विशेष सफाइ अभियान शुरू गरिएको छ।

साउन महिना र सोमबारलाई आशुतोष भगवान् शिवको महिना र बार मानिने भएकाले यस अवधिमा पशुपतिनाथमा दर्शनार्थीको अत्यधिक घुइँचो लाग्ने गर्दछ। भक्तजनहरूलाई सहज रूपमा सेवा दिने र मन्दिर परिसरलाई स्वच्छ राख्ने उद्देश्यले पशुपति क्षेत्र विकास कोषले शनिबारदेखि यो सफाइ अभियान थालेको हो।