दिक्तेल रुपाकोट मझुवागढीलाई प्लास्टिक फोहरमुक्त बनाउने अभियान

खोटाङ । दिक्तेल रुपाकोट मझुवागढी नगरपालिकामा ‘प्लास्टिक तथा सिसाजन्य फोहरमुक्त सार्वजनिकस्थल, जलवायुमैत्री र सभ्य नगर निर्माण अभियान’ थालिएको छ। जिल्लाको प्रमुख व्यापारिक केन्द्र दिक्तेल बजारमा पर्ने यो नगरपालिकालाई सफा, सुन्दर र सभ्य बनाउन तीन महिने अभियान सुरु गरिएको हो।

नगर प्रमुख तीर्थराज भट्टराईले नगरपालिकाले गठन गरेको हरित विद्यार्थी दूतले आफ्नो घर, टोल र समुदायमा प्लास्टिक तथा सिसाजन्य फोहरको प्रयोग घटाउन, जथाभावी नफाल्न, नजलाउन, फोहोर वर्गीकरण गर्न तथा वातावरण संरक्षणका लागि परिवार र समुदायलाई प्रेरित गर्ने जानकारी दिए ।