मनसुनले रोक्यो जोमसोम उडान, निलगिरीको मनमोहक दृश्यले भने लोभ्याइरहेकै छ

काठमाडौं- मौसम खुलेसँगै देखिने निलो आकास मुनि मुस्ताङको जोमसोमबाट सेताम्मे निलगिरी हिमालको मनमोहक दृश्य देखिन्छ । आकाशमा कतै-कतै देखिएका सेता बादल विस्तारै हट्दै जाँदा चम्किलो घामसँगै निलगिरी हिमाल झन् आकर्षक बन्ने गरेको छ ।

जोमसोम विमानस्थलबाट निकै नजिकै रहेको निलगिरी हिमालको मनोरम दृश्यले यहाँ पुग्ने पर्यटकको मनै लोभ्याउने गरेको छ । विमानस्थलबाटै स्पष्ट देखिने निलगीरी हिमालले मुस्ताङ भ्रमणमा आउने गरेको पर्यटकलाई अझ आकर्षित गर्ने गरेको छ । विशेषगरी मुक्तिनाथ दर्शनका लागि जोमसोम विमानस्थल हुँदै यात्रा गर्ने पर्यटकले निलगिरी हिमालको प्राकृतिक सौन्दर्य अवलोकन गर्दै यात्रा गर्ने अवसर समेत पाउने गरका छन् ।