रसुवा बाढीको उद्धार र पुनःस्थापनामा जुट्यो ऊर्जा मन्त्रालय, क्षतिको विवरण संकलन गर्न समिति गठन

काठमाडौं । रसुवा जिल्लामा आएको आकस्मिक बाढीका कारण जलविद्युत् आयोजना, प्रसारण लाइन तथा अन्य भौतिक पूर्वाधारमा ठूलो क्षति पुगेपछि ऊर्जा, जलस्रोत तथा सिँचाइ मन्त्रालयले उद्धार, राहत तथा विद्युत् आपूर्ति पुनःस्थापनाका लागि तीव्र पहल थालेको छ । मन्त्रालयले बुधबारप्रेस विज्ञप्ति जारी गर्दै बाढी प्रभावित क्षेत्रमा भइरहेको उद्धार तथा पुनःस्थापनाका कार्यबारे जानकारी दिएको हो ।

बाढीका कारण रसुवा र नुवाकोट जिल्लाका सञ्चालनमा रहेका र निर्माणाधीन गरी १४ वटा जलविद्युत् आयोजनाहरू प्रभावित भएका छन् । मन्त्रालयका अनुसार रसुवामा सञ्चालनमा रहेका ५ वटा (कुल २३६ मेगावाट) र निर्माणाधीन ३ वटा (कुल ३४२.४२ मेगावाट) आयोजना प्रभावित बनेका छन्।