जङ्गलमा हराएकी आमा भेटिँदाको त्यो खुसी, सुगुरेको भीरमा बज्रपात

बझाङ । बझाङको आकाश बिहानैदेखि धुम्म थियो। मनसुनको निरन्तर वर्षाले पहाडी भिराला पाटा भिजिसकेका थिए। तर, दुर्गाथली गाउँपालिका–६ चुवाबनकी ६५ वर्षीया केलादेवी महतको परिवार र आफन्तका लागि भने त्यो दिन एउटा अर्कै आशा र खुसी लिएर उदाएको थियो।

कथाको त्यान्द्रो ठ्याक्कै एक महिना अघिदेखि जोडिन्छ। लामो समयदेखि स्वास्थ्य समस्याले थलिएकी केलादेवीका श्रीमान्को एक महिनाअघि निधन भएको थियो। जीवनसङ्गी गुमाउनुको असह्य पीडा र मानसिक तनावमा रहेकी उनी छोरा–बुहारीसँग रातामाटीमा बस्दै आएकी थिइन्।