भोटेकोशी बाढीका मृतकको सम्झनामा बराहक्षेत्रमा १०८ दीप प्रज्वलन, सेतो परेवा उडाएर श्रद्धाञ्जली

सुन्दरहरैंचा (मोरङ) । कोही आफन्तको खोजीमा छन्, कोही शवको पर्खाइमा। कतिपय परिवारका प्रियजन कहिल्यै नफर्कने गरी अस्ताएका छन्। भोटेकोशीमा आएको विनाशकारी बाढीले छाडेको यही अपार पीडाबीच पूर्वको पवित्र धार्मिक स्थल सुनसरीको बराहक्षेत्रस्थित कोशी संगममा १०८ दीप बलेका छन्।

बाढीमा परी ज्यान गुमाएका नागरिकहरूको चीर शान्तिको कामना गर्दै कोकाहा (कोका) र सप्तकोशी नदीको पवित्र संगमस्थलमा मंगलबार साँझ १०८ दीप प्रज्वलन गरिएको हो। दीप प्रज्वलनपश्चात् एक जोडी सेतो परेवा आकाशमा उडाएर दिवंगत आत्माप्रति श्रद्धाञ्जली अर्पण गरियो।