नागार्जुनमा ‘कृषि सांस्कृतिक तथा व्यापार महोत्सव’ सुरु

काठमाडौं। काठमाडौंको नागार्जुन नगरपालिका वडा नम्बर ५ हरिसिद्धि, सितापाइलामा ‘कृषि सांस्कृतिक तथा व्यापार महोत्सव’ भव्य रूपमा सुरु भएको छ। राष्ट्रिय लोक सांस्कृतिक प्रतिष्ठान नेपालको आयोजनामा सञ्चालित उक्त महोत्सवको एक विशेष समारोहका बिच उद्घाटन गरिएको हो। महोत्सवको उद्घाटन नागार्जुन नगरपालिकाका प्रवक्ता एवं वडा नम्बर ५ का वडाध्यक्ष महेश रिमालले गरे।

उद्घाटन मन्तव्य राख्दै रिमालले स्थानीय कृषि उत्पादनको प्रवर्द्धन, आन्तरिक व्यापारको विस्तार र लोक संस्कृतिको जगेर्ना गर्न यस्ता महोत्सवहरूले महत्त्वपूर्ण भूमिका खेल्ने बताए। उद्घाटन कार्यक्रम राष्ट्रिय लोक सांस्कृतिक प्रतिष्ठान नेपालका अध्यक्ष नमराज ढुंगानाको अध्यक्षतामा सम्पन्न भएको थियो।