६० करोडको सडक योजना, तीन वर्षमा २ प्रतिशत मात्रै प्रगति

मुगुको बहुप्रतीक्षित रारा–सल्लेरी–पिना–कुटिला–घट्टलेख सडक आयोजना निर्माण सुरु भएको तीन वर्ष बितिसक्दा पनि अपेक्षित गति लिन सकेको छैन। करिब ६० करोड रुपैयाँ लागत अनुमान गरिएको आयोजनाको भौतिक प्रगति सम्झौता अवधि सकिन लाग्दासमेत करिब २ प्रतिशतमा सीमित रहेको तथ्य सार्वजनिक भएको छ।

यो सडक निर्माणका लागि शेर्या कन्स्ट्रक्सन प्रालिले ३५ करोड ५५ लाख रुपैयाँमा ठेक्का सम्झौता गरेको थियो। करिब १० किलोमिटर लामो सडक निर्माणका लागि तीन वर्षको अवधि तोकिएको थियो। तर निर्माण अवधि २०८३ असार २७ गते सकिन लाग्दा हालसम्म करिब १ करोड २ लाख रुपैयाँ बराबरको मात्रै काम भएको तथ्यांकले देखाएको छ।