अलैँची निर्यातमा कीर्तिमान, ११ महिनामा भित्रियो १२ अर्ब रुपैयाँ

काठमाडौँ- चालु आर्थिक वर्षको पहिलो ११ महिनामा नेपालबाट निर्यात हुने अलैँचीको मूल्य हालसम्मकै उच्च स्तरमा पुगेको छ। भन्सार विभागका अनुसार साउनदेखि जेठसम्म (आर्थिक वर्ष २०८२/८३ को पहिलो ११ महिना) नेपालले ६० लाख ३० हजार किलोग्राम अलैँची निर्यात गरी १२ अर्ब एक करोड रुपैयाँ आम्दानी गरेको छ। समीक्षा अवधिमा प्रशोधित भटमास तेलपछि अलैँची नेपालको दोस्रो ठूलो निर्यातजन्य वस्तु बनेको छ।

आर्थिक वर्ष सकिन अझै एक महिना बाँकी रहँदै अलैँची निर्यातबाट भएको आम्दानीले अघिल्ला सबै वार्षिक कीर्तिमान पार गरिसकेको छ। पछिल्लो तथ्यांकले नेपाली किसानले यस वर्ष राम्रो मूल्य पाएको संकेत गर्छ। आर्थिक वर्ष २०७९/८० मा नेपालले ९९ लाख ९० हजार किलोग्राम अलैँची निर्यात गरेको थियो, जुन हालसम्मकै उच्च परिमाण थियो। त्यसबाट आठ अर्ब २७ करोड रुपैयाँ मात्र आम्दानी भएको थियो। यसको तुलनामा यस वर्ष कम परिमाण निर्यात हुँदासमेत १२ अर्ब रुपैयाँभन्दा बढी आम्दानी भएको छ।