बाढीमा रामेछापका २६ जना बेपत्ता, खोजी र उद्धारका लागि आग्रह

काठमाडौँ । रसुवागढी र आसपासको क्षेत्रमा भोटेकोशी नदीमा आएको भीषण बाढीमा परी रामेछाप जिल्लाका २६ जना नागरिक बेपत्ता भएका छन्। बाढी आएपछि उनीहरू सम्पर्कविहीन भएको रामेछापबाट निर्वाचित बागमती प्रदेश सभा सदस्य आनन्द श्रेष्ठले जानकारी दिएका छन्।

बाढीमा परि बेपत्ता भएकाहरूसँग सम्पर्क हुन नसकेपछि उनीहरूको शीघ्र खोजी तथा उद्धारका लागि सम्बन्धित निकाय, सुरक्षाकर्मी र स्थानीयवासीलाई परिवारजनले विशेष आग्रह गरेका छन्। साथै, आधिकारिक तथा भरपर्दो सूचना नआएसम्म नआत्तिन र धैर्यधारण गर्न परिवारजनलाई अनुरोध गरिएको छ। प्रदेश सभा सदस्य श्रेष्ठका अनुसार बेपत्ता हुनेहरूमा रामेछाप र मन्थली नगरपालिका सहित खाँडादेवी, दोरम्बा शैलुङ, गोकुलगंगा, उमाकुण्ड र लिखु तामाकोशी गाउँपालिकाका बासिन्दा रहेका छन्।