‘केही कर्मसाधकहरू’सँग गाँसिएका जीवनाथ धमला

जीवनाथ धमला नेपाली साहित्यमा परिचित नाम हो । उनी विशेषतः विशिष्ट व्यक्तिहरूको वृत्तचित्र बनाउने कलामा सुपरिचित छन् । उनी नेपाल टेलिभिजनबाट प्रसारण हुने विभिन्न विशिष्ट व्यक्तिहरूका जीवनी र व्यक्तित्वमा आधारित वृत्तचित्रसँग जोडिएका छन् । नेपाल टेलिभिजनका दृश्यहरू सीमाविहीन भएर फैलिएजस्तै जीवनाथ धमलाको कर्म ‘कर्मसाधकहरू’लाई पहिचान गर्ने गरी फैलिएको छ । उनका तिनै दृष्टिहरूको फैलावटबाट बनेको पुस्तकको नाम हो ‘केही कर्मसाधकहरू’ ।

रेडियो नेपालमा समाचार वाचन गर्ने कृष्णा ताम्राकार, नेपाल टेलिभिजनमा ‘विश्व घटना’ प्रस्तुत गर्ने दुर्गानाथ शर्मा, रेडियो नेपालकै ‘साहित्य संसार’ कार्यक्रममा स्वर दिने दाहाल यज्ञनिधि, रेडियो नेपालमा ‘घटना र विचार’ प्रस्तुत गर्ने पुरुषोत्तम दाहाल र नेपाल टेलिभिजनबाट प्रसारण भएका विभिन्न विशिष्ट व्यक्तित्वहरूका जीवनी र व्यक्तित्वबारेका वृत्तचित्रमा प्रस्तुति दिने जीवनाथ धमला मलाई आ–आफ्ना क्षेत्रका उस्तै–उस्तै मानकजस्ता लाग्छन् ।