जाजरकोटमा पहिरोले भूकम्पपीडितको अस्थायी टहरा पुर्दा एक महिलाको मृत्यु

काठमाडौँ । जाजरकोटमा अविरल वर्षापछि आएको पहिरोले भूकम्पपीडित बस्दै आएको अस्थायी टहरा पुर्दा एक महिलाको दुःखद मृत्यु भएको छ। जिल्लाको भेरी नगरपालिका–२ राङ्सी निवासी ६० वर्षीया जयशिला शाहको पहिरोमा पुरिएर घटनास्थलमै मृत्यु भएको हो।

जिल्ला प्रहरी कार्यालय जाजरकोटका अनुसार गएराति परेको निरन्तर वर्षाका कारण बस्तीमाथिबाट पहिरो खसेको थियो। उक्त पहिरोले २०८० साल कार्तिक १७ गतेको विनाशकारी भूकम्पपछि पीडित परिवारका लागि निर्माण गरिएको अस्थायी टहरालाई पुरेको थियो। राति सुतिरहेको अवस्थामा टहरा पुरिँदा शाह बाहिर निस्कन पाइनन्।