हुलाकी सडक: चार किमि सडक बनाउन चारै पटक ठेक्का

मुलुककै पुरानो विकास आयोजनामध्ये एक हुलाकी राजमार्गअन्तर्गत पर्ने बारा खण्डको एउटा सडक निर्माणमा भएको ढिलाइले स्थानीयवासी १६ वर्षदेखि सास्ती भोग्न बाध्य छन्। चार किलोमिटर सडक निर्माणका लागि १६ वर्षमा चार पटकसम्म ठेक्का प्रक्रिया अघि बढाउनुपर्ने अवस्था आए पनि सडक अझै पूर्ण रूपमा निर्माण हुन सकेको छैन।

मानमत– कलैया– मटिअर्वा हुलाकी सडक खण्डअन्तर्गत कलैया बजार क्षेत्रको संस्कार एफएमदेखि देवीगन्जसम्म तथा अन्य केही भागमा अधुरै रहेको सडक निर्माणका लागि अहिले चौथो पटक ठेक्का प्रक्रिया सुरु गरिएको छ। पटक–पटक ठेक्का लाग्ने, निर्माण कम्पनी परिवर्तन हुने र सम्झौता तोडिने क्रमले सडक निर्माणको लागत र समय दुवै बढेको छ भने स्थानीय नागरिक वर्षौंदेखि धुलो, हिलो र जोखिमपूर्ण यात्रा गर्दै आएका छन्।