योजना आयोगको गुनासो : हाम्रो काम सुझाव दिने मात्रै भयो, कार्यान्वयन भएन

काठमाडौँ । राष्ट्रिय योजना आयोगले मुलुकको आगामी २५ वर्षको विकास मार्गचित्र समेटिएको ‘भिजन २०५०’ को अवधारणामा काम सुरु गर्ने भएको छ। प्रतिनिधिसभा अन्तर्गतको अर्थ समितिको बैठकमा आयोगका उपाध्यक्ष डा.गुणाकर भट्ट र सचिव रविलाल पन्थले आयोगको आगामी कार्यदिशा, आयोजनाहरूको प्रभावकारिता र संरचनागत सुधारका विषयमा आफ्नो धारणा राखे।

बैठकमा बोल्दै उपाध्यक्ष डा.गुणाकर भट्टले १६ औँ योजनाको मध्यावधि समीक्षासँगै आगामी २५ वर्षका लागि ‘भिजन २०५०’ निर्माणको प्रक्रिया अघि बढाइएको जानकारी दिए । ‘मुलुकलाई समृद्ध बनाउन एउटा ठोस दीर्घकालीन सोच आवश्यक छ, जसका लागि हामीले नागरिक र विज्ञहरूसँग संवाद गरेर प्रमाणमा आधारित नीति निर्माण गर्नेछौँ,’ उनले भने ।