विद्यालयमा राजनीति अन्त्य गर्न लागेपछि सरकारप्रति विद्यालय व्यवस्थापन समिति महासंघको आक्रोश

काठमाडौँ- सरकारले हालै जारी गरेको ‘शिक्षा नियमावलीको दशौँ संशोधन’ प्रति सामुदायिक विद्यालय व्यवस्थापन समिति महासंघ नेपालले आपत्ति जनाउँदै तत्काल संशोधनको माग गरेको छ।

देशभरका २६ हजारभन्दा बढी सामुदायिक विद्यालयका व्यवस्थापन समितिहरूको साझा छाता संगठन महासंघका केन्द्रीय अध्यक्ष काशीनाथ दंगालद्वारा जारी विज्ञप्तिमा यो संशोधनले विद्यालय व्यवस्थापन समितिको क्षेत्राधिकार संकुचन गर्ने, समुदायको अस्तित्व र भूमिकालाई अवमूल्यन गर्ने तथा सामुदायिक विद्यालयलाई ध्वस्त बनाउने कुत्सित मनसाय बोकेको आरोप लगाइएको छ।