ध्रुवेकाे आक्रमणबाट १४ वर्षमा बाेटे परिवारका ४ जनाको मृत्यु, के हात्तीले वर्षौँसम्म रिस राख्छ ?

चितवन- बोटे परिवारका चार जनाको चितवन राष्ट्रिय निकुञ्जको जंगली ध्रुवे हात्तीको आक्रमणबाट अकालमा निधन भएपछि हात्तीको स्वभावका विषयमा बहस सुरु भएको छ। विज्ञहरूले हात्तीले रिस साँध्ने भए पनि कति समयसम्म रिस साँध्छ सक्छ भन्ने विषयमा भने स्पष्ट निष्कर्ष निकाल्न सकेका छैनन्।

ध्रुवेले गत शनिबार राति भरतपुर महानगरपालिका–२३ मा आमा–छोराको ज्यान लिएको थियो। शनिबार राति घरमै बसिरहेका बेला अचानक जंगलबाट आएको ध्रुवेले २१ वर्षीया आशिका बोटे र उनका चार वर्षीय छोरा भरत बोटेको ज्यान लिएको थियो। हात्ती धपाउन आशिकाका श्रीमान् पुनु बोटेले आगो बाल्न खोज्दा घर नै जलेर नष्ट भएको थियो।