शिक्षा अधिकृतमाथि मोबिल छ्याप्ने वडा सदस्य पक्राउ

काठमाडौं । घोराही उपमहानगरपालिकाका शिक्षा अधिकृत अजय बोहरामाथि गुडिरहेको मोटरसाइकलमै मोबिल खन्याएर दुर्व्यवहार गरेको भिडिओ भाइरल भएपछि वडा सदस्य पक्राउ परेका छन् । जिल्ला प्रहरी कार्यालय दाङले घोराही उपमहानगरपालिका वडा नं. १५ का वडा सदस्य ४२ वर्षीय उत्तम बुढाथोकीलाई सोमबार पक्राउ गरेको हो ।

२७ असार (शनिबार) बिहान घोराही-१५ स्थित पद्मोदय पब्लिक नमुना माध्यमिक विद्यालयको विद्यालय व्यवस्थापन समितिको निर्वाचन कार्यतालिका थियो । निर्वाचन समितिको तर्फबाट मतदान अधिकृतका रूपमा खटिएका उपमहानगरका शिक्षा अधिकृत अजय बोहोरा आफ्नो रा १ ब १०४२ नम्बरको सरकारी मोटरसाइकलमा जाँदै थिए । सोही क्रममा वडा सदस्य बुढाथोकीले उनलाई बीच बाटोमै रोकी निर्वाचन नरोकेको झोकमा शरीरभरि मोबिल खन्याइ दिएका थिए ।