कृषि रूपान्तरणमा सरकारको प्रतिबद्धतालाई महासंघको स्वागत, कार्यान्वयनमा जोड

काठमाडौं । राष्ट्रिय कृषक समूह महासंघ, नेपालले मन्त्रिपरिषद्‌बाट स्वीकृत ‘कृषि पेसाको सम्मान र आत्मनिर्भरता’सम्बन्धी राष्ट्रिय प्रतिबद्धतालाई सकारात्मक कदम भन्दै स्वागत गरेको छ । महासंघले एक प्रेस विज्ञप्ति जारी गर्दै सरकारको यो नयाँ मार्गचित्रले कृषि क्षेत्रमा वास्तविक परिवर्तन ल्याउने विश्वास व्यक्त गरेको छ ।

मन्त्रिपरिषद्को कार्यालयबाट गत असार १८ गते जारी गरिएको राष्ट्रिय प्रतिबद्धताको बुँदा नम्बर २ मा कृषि क्षेत्रको विकासका लागि विभिन्न महत्त्वपूर्ण नीतिहरू समेटिएका छन् । महासंघका अनुसार, आयात प्रतिस्थापनका लागि उत्पादन वृद्धि, कृषि उद्यममा छुट र प्रोत्साहन, तथा भू–उपयोग योजनाको प्रभावकारी कार्यान्वयन जस्ता बुँदाहरू स्वागतयोग्य छन् ।