कोशी प्रदेश सरकारको बजेट खर्च ६ वर्ष यताकै कम, विकास खर्च लगातार घट्दो

विराटनगर । कोशी प्रदेश सरकार र मातहतका मन्त्रालयहरूले आर्थिक वर्ष २०८२/०८३ मा कुल बजेटको ७२.७२ प्रतिशत रकम खर्च गरेका छन् । कोशी प्रदेश लेखा नियन्त्रक कार्यालयले सार्वजनिक गरेको प्रारम्भिक खर्च विवरण अनुसार प्रदेश सरकारले आर्थिक वर्षको अन्त्यसम्ममा २६ अर्ब २५ करोड २५ लाख ४८ हजार रुपैयाँ खर्च गरेको हो ।

प्रदेश सरकारले चालु आर्थिक वर्षका लागि ३६ अर्ब ९ करोड ८५ लाख रुपैयाँ बजेट कायम गरेको थियो । चालुतर्फ कुल १८ अर्ब ८५ करोड २२ लाख ९२ हजार रुपैयाँ बजेट विनियोजन गरिएकोमा १३ अर्ब ८२ करोड १२ लाख ४१ हजार २१७ रुपैयाँ अर्थात् ७३.३१ प्रतिशत खर्च भएको छ । यस्तै पुँजीगततर्फ कुल १७ अर्ब १४ करोड ६२ लाख ३० हजार रुपैयाँ विनियोजन गरिएकोमा १२ अर्ब ३८ करोड ५८ लाख ८३ हजार ७२० रुपैयाँ खर्च भएको छ । यो कुल पुँजीगत बजेटको ७२.२४ प्रतिशत हो ।