पर्वत, स्याङ्जा र गुल्मीको सङ्गमस्थलमा रहेको विश्वकै ठूलो शालिग्राम शिला डुबानमा

काठमाडौँ । पर्वत, स्याङ्जा र गुल्मी जिल्लाको सङ्गमस्थल सेतीवेणीमा रहेको विश्वकै ठूलो शालिग्राम शिला डुबानमा परेको छ। दुई दिनदेखि जारी अविरल वर्षाका कारण कालीगण्डकी नदी र सेतीखोलाको जलसतह ह्वात्तै बढेपछि पवित्र शिला पूर्ण रूपमा पानीमुनि परेको हो।

शालिग्राम विद्याश्रमका संरक्षक कुलराज तिवारीका अनुसार शिलामा जाने बाटो, नजिकै रहेको सत्तल र परिक्रमास्थल समेत डुबिसकेको छ। शिला डुबानमा परेसँगै त्यहाँ कार्यरत पुजारी तथा पण्डितहरू सुरक्षित स्थानमा विस्थापित भएका छन् भने नियमित पूजापाठ र दर्शन कार्य पूर्ण रूपमा ठप्प भएको छ। भक्तजनहरू शिलाको दर्शन गर्नबाट वञ्चित भएका छन्।