चर्चामा भार र नयाँ प्रविधि

फिफा विश्वकपमा खेलाडीहरूको प्रदर्शनसँगै भिडियो सहायक रेफ्री (भिएआर) र नयाँ प्रविधिसँग सम्बन्धित निर्णयहरू पनि लगातार चर्चाको केन्द्रमा छन्। क्वार्टरफाइनलमा स्विट्जरल्यान्ड र अर्जेन्टिनाबिचको खेलपछि फेरि एकपटक रेफ्रीको निर्णयमाथि प्रश्न उठ्यो।

यसअघि जर्मनी, क्रोएसिया, इजिप्ट र नर्वे पनि यस्तै विवादास्पद निर्णयका कारण उत्तरी अमेरिकामा जारी विश्वकपबाट बाहिरिनुपरेको समर्थकको आरोप छ। अर्जेन्टिनासँग क्वार्टरफाइनलमा स्विट्जरल्यान्डका फरवार्ड ब्रिल एम्बोलोले दोस्रो पहेंलो कार्ड पाएपछि नयाँ नियम ‘मिस्टेकन आइडेन्टिटी’ (गलत खेलाडी पहिचान) सम्बन्धी नियममाथि व्यापक बहस सुरु भएको हो। अर्जेन्टिनाका लिएन्ड्रो परेडेससँगको चुनौतीपछि एम्बोलोले फाउलको अभिनय गरेको रेफ्री जोआओ पिन्हेइरोले तत्काल देख्न सकेनन्। रेफ्रीले सुरुमा परेडेसलाई पहेंलो कार्ड देखाए। यो निर्णयमा भारले हस्तक्षेप गर्ने अधिकार पायो। पछि रेफ्रीले एम्बोलोले फाउलको नाटक गरेको निष्कर्षसहित उनलाई दोस्रो पहेंलो कार्ड देखाए। त्यससँगै उनी रातो कार्डसहित मैदानबाट बाहिरिए।