दूरसञ्चार प्राधिकरणको अध्यक्षमा अर्जुन घिमिरे नियुक्त

काठमाडौं । नेपाल दूरसञ्चार प्राधिकरणको अध्यक्षमा अर्जुन घिमिरे नियुक्त भएका छन्। घिमिरेले सोमबार सूचना तथा सञ्चारमन्त्री विक्रम तिमिल्सिनाबाट नियुक्तिपत्र ग्रहण गर्दै पद तथा गोपनीयताको शपथसमेत लिए। मन्त्रिपरिषद्को असार २४ को निर्णयअनुसार उनलाई नियुक्त गरिएको सञ्चार मन्त्रालयले जनाएको छ।

अगाडिको मिति राखेर नियुक्त गरिएको भन्दै कतिपयले उनको नियुक्तिमाथि प्रश्न उठाएका छन्। अध्यक्षका लागि अन्तर्वार्ता लिएको र मन्त्रिपरिषद्को निर्णय भएको भनिएको मिति एकै दिन परेको देखिएपछि प्राविधिक र व्यावहारिक रूपमा सो सम्भव नभएको उनीहरूको भनाइ छ। यसबारे प्रतिक्रिया लिँदा मन्त्रालय स्रोतले भन्यो, ‘एक जना प्रतिस्पर्धी अनुपस्थित हुँदा अन्तर्वार्ता समयअघि नै सकिएको र सोही दिन निर्णय गराउने गरी सिफारिस समितिबाटै मन्त्रिपरिषद्मा नाम पुगे हो।’