मिडिया र राजनीतिक नेतृत्वमाथि त्रास फैलाउनेलाई कारबाही गर्न एमाले सांसद ठगुन्नाको माग

काठमाडौँ । प्रतिपक्षी दल नेकपा (एमाले) का सांसद गणेशसिंह ठगुन्नाले मिडिया र राजनीतिक नेतृत्वमाथि मानसिक त्रास फैलाउने गतिविधिमा संलग्नहरूलाई तत्काल कडा कारबाही गर्न सरकारसँग माग गरेका छन्। मङ्गलबार बसेको प्रतिनिधि सभा बैठकमा बोल्दै सांसद ठगुन्नाले विभिन्न सञ्चारमाध्यम र राजनीतिक नेतृत्वको घरमा सवारी साधन तेर्स्याएर त्रास फैलाउने काम भएको भन्दै आपत्ति जनाएका हुन्।

उनले यस किसिमको गतिविधिलाई पञ्चायतकालीन मण्डले तन्त्रले फैलाएको राज्य आतङ्कको झल्कोका रूपमा चित्रण गर्दै यस्ता सांकेतिक गतिविधिहरू देशको हितमा नरहेको स्पष्ट पारे। हेर्दा सामान्य लागे पनि यो गम्भीर विषय भएको हुनाले सरकारले यस कार्यमा संलग्न व्यक्तिहरूलाई कानुन बमोजिम कडा कारबाही गर्नुपर्ने उनको जोड थियो।