व्यावसायिक उत्पादनतर्फ भीरकोटको पहल

स्याङ्जा । किसानले खेती गर्न छाडेको स्याङ्जाको भीरकोट नगरपालिकाका जमिनमा अहिले बिस्तारै हरियाली छाएको छ । नगरपालिकाको अगुवाइमा सयौँ रोपनी जमिनमा खुर्सानी खेती गरिएको छ । नगरपालिकालाई कृषिमा आत्मनिर्भर बनाउँदै ग्रामीण अर्थतन्त्रलाई विस्तार तथा सुदृढीकरण गर्ने उद्देश्यले नगरपालिकाको अगुवाइमा १ सय २५ रोपनी क्षेत्रफलमा खुर्सानी खेती गरिएको हो ।

नगरपालिकामा सञ्चालित विभिन्न कार्यक्रमअन्तर्गत खुर्सानी खेतीलाई प्रवद्र्धन गर्न नगरपालिकाकै अगुवाइमा यो खेती गरिएको छ । नगरका ९ वटै वडामा २६ वटा सामूहिक नर्सरी स्थापना गरी उत्पादित १ लाख ४ सयवटा अकबरे खुर्सानीका बिरुवा २ सय ७० जना कृषकलाई वितरण गरी झन्डै १ सय २५ रोपनी क्षेत्रफलमा खेती विस्तार गरिएको छ ।