दूरसञ्चार प्राधिकरणका नयाँ अध्यक्ष घिमिरेको काँधमा चुनौतीका चाङ !

नेपालको दूरसञ्चार क्षेत्र लामो समयदेखि नीतिगत अन्योल, कानूनी विवाद, घट्दो लगानी, प्रविधिगत सुस्तता र नियामकीय निर्णयका कारण कठिन मोडमा उभिएको छ । यस्तै समयमा सरकारले यही असार २४ गते नेपाल दूरसञ्चार प्राधिकरणको अध्यक्षमा अर्जुन घिमिरेलाई नियुक्त गरेको छ । प्राधिकरणमा दुई दशकभन्दा बढी समय बिताएका घिमिरेका लागि यो नियुक्ति व्यक्तिगत उपलब्धि मात्र होइन, नेपालको दूरसञ्चार क्षेत्रलाई नयाँ दिशा दिने अवसर पनि हो ।

आगामी पाँच वर्ष उनीसँग केवल एउटा संस्थाको नेतृत्व गर्ने जिम्मेवारी छैन । नेपाल टेलिकम, एनसेल, इन्टरनेट सेवा प्रदायक कम्पनी, स्पेक्ट्रम व्यवस्थापन, नयाँ प्रविधिको विस्तार, उपभोक्ता अधिकार, प्रतिस्पर्धा र विदेशी लगानीप्रतिको सरकारी दृष्टिकोणसम्मका विषयमा उनको नेतृत्वको परीक्षा हुनेछ ।