बढ्दै इरान-अमेरिका तनाव : आफ्ना नागरिक मारिएपछि भारतले इरानी कूटनीतिज्ञलाई बोलायो

मंगलबार बिहान होर्मुजको जलमार्गमा दुई व्यापारिक जहाजमाथि आक्रमण भएपछि पश्चिम एसियाको सुरक्षा अवस्था जटिल बनेको छ। उक्त आक्रमणमा परी एक भारतीय चालक दलका सदस्यको मृत्यु भएको छ भने १० जना घाइते भएका छन्।

घटनाप्रति भारतले कडा प्रतिक्रिया जनाएको छ। भारतीय विदेश मन्त्रालयले नयाँ दिल्लीस्थित इरानी दूतावासका उपप्रमुखलाई बोलाएर कडा विरोध दर्ता गराएको छ। मन्त्रालयले आक्रमणको निन्दा गर्दै अन्तर्राष्ट्रिय समुद्री मार्गमा यस्ता गतिविधि तत्काल बन्द गर्नुपर्नेमा जोड दिएको छ।