अन्ततः बग्दादकै माटोमा विलिन भइन् सञ्चमाई

काठमाडौं । राम्रो भविष्यको सपना बोकेर वैदेशिक रोजगारीका लागि इराक पुगेका सिन्धुपाल्चोकको तत्कालीन गोल्चे गाविस–६ (हाल जुगल गाउँपालिका–२) निवासी सञ्चमाई लोप्चन अब कहिल्यै आफ्नो जन्मभूमि फर्किन सकेनन्। सन् २०२४ को अक्टोबरमा बग्दादमा उनी झुन्डिएको अवस्थामा मृत फेला परे। त्यसपछि सुरु भएको पीडा, अन्योल र कानुनी प्रक्रियाको लामो यात्रा अन्ततः उनको शव बग्दादमै अन्त्येष्टि भएपछि टुंगिएको छ।

मृत्युको खबरले परिवारलाई शोकमा डुबायो। त्यसपछि उनको शव नेपाल ल्याएर आफ्नै गाउँको माटोमा अन्तिम संस्कार गर्ने आशा परिवार, आफन्त र शुभेच्छुकले गरेका थिए। नेपाली राजदूतावास कुवेत, रोजगारदाता कम्पनी तथा इराकस्थित नेपाली समुदायले शव स्वदेश ल्याउन विभिन्न प्रयास पनि गरे। बग्दादमा सञ्चालन गरिएको राहदानी घुम्ती सेवाका क्रममा समेत कम्पनीसँग छलफल गर्दै शव नेपाल पठाउन र घटनाको वास्तविकता पत्ता लगाउन निरन्तर पहल गरिएको थियो।