काठमाडौं उपत्यका हैजाको उच्च जोखिममा

काठमाडौंका विभिन्न अस्पतालमा हैजाका शंकास्पद बिरामी पुगेको इपिडिमियोलोजी तथा रोग नियन्त्रण महाशाखाले जनाएको छ। महाशाखाका अनुसार मंगलबार सशस्त्र प्रहरी बल अस्पताल, बलम्बुमा उपचारका लागि पुगेका एक जना र सोमबार शुक्रराज ट्रपिकल तथा सरुवा रोग अस्पताल (टेकु) मा पुगेका अर्का एक जनामा शंकास्पद हैजा देखिएको हो। उनीहरूमा आरडीटी (र्‍यापिड डाइग्नोस्टिक टेस्ट) परीक्षणबाट हैजाको संकेत देखिएको छ।

उनीहरू झाडापखाला र बान्ताका लक्षण देखिएपछि उपचारका लागि अस्पताल पुगेका थिए। उनीहरूको नमूनाको कल्चर परीक्षण भइरहेको र रिपोर्ट आउन बाँकी रहेको इपिडिमियोलोजी तथा रोग नियन्त्रण महाशाखाको रोग निगरानी शाखाका प्रमुख हेमराज पाण्डेले जानकारी दिए।