स्थानीय तहका सेवा एउटै प्लेटफर्ममा, ‘ओखलढुङ्गा कनेक्ट’ सञ्चालनमा

काठमाडौं । ओखलढुङ्गाका नागरिकले अब स्थानीय सरकारका सेवा, सूचना र सम्बन्धित अधिकारीको विवरण एकै ठाउँबाट अनलाइनमार्फत प्राप्त गर्न सक्ने भएका छन् । नागरिक र स्थानीय सरकारबीचको सम्बन्धलाई डिजिटल माध्यमबाट सहज बनाउने उद्देश्यले ‘ओखलढुङ्गा कनेक्ट’ नामक नि:शुल्क वेब एप सञ्चालनमा ल्याइएको हो ।

ओखलढुङ्गाका स्थानीयवासी तथा सूचना प्रविधि उद्यमी जीवन श्रेष्ठले विकास गरेको उक्त प्लेटफर्म यसै सातादेखि सञ्चालनमा आएको हो । श्रेष्ठका अनुसार प्लेटफर्मले जिल्लावासीलाई सरकारी सेवा तथा सूचनामा सहज पहुँच दिलाउनुका साथै स्थानीय सरकार र नागरिकबीच डिजिटल सम्पर्कको माध्यमका रूपमा काम गर्नेछ ।