२ वर्षदेखि न्यायको पर्खाइमा श्यामुकुमारी

सिमरा : धनुषाधाम नगरपालिका–२ मंगलपुरकी श्यामुकुमारी ठाकुरको आँखाका आँसु सुकेका छैनन, न त उनको न्यायका लागि सुरु भएको संघर्ष नै रोकिएको छ। मिटरब्याजको पासो र त्यसपछि निम्तिएको क्रुर हिंसामा आफ्ना पति भोगेन्द्र ठाकुरलाई गुमाएको दुई वर्ष बितिसक्दा पनि श्यामुकुमारी न्याय र भत्किएको परिवार सम्हाल्ने पीडादायी संघर्षमै छिन्।

२०८१ साल साउन १४ गते दिउँसो हातहतियारसहित आएका १० जनाको समूहले उनीहरूको घरमै पसेर अन्धाधुन्ध आक्रमण गरेको थियो। मिटरब्याजको शिकार बनेका भोगेन्द्रमाथि भएको उक्त क्रुर हमलामा श्यामुकुमारी आफैं पनि गम्भीर घाइते भइन्। आफ्नै आँखाअगाडि रक्ताम्य भएका पतिलाई अस्पताल लैजाँदै गर्दा बाटोमै मृत्यु भयो। श्यामुकुमारी भने जीवन र मरणको दोसाँधबाट फर्किन सफल भइन्, तर उनको जीवन पहिले जस्तो भने रहन सकेन।