निर्माण क्षेत्र सुस्त हुँदा पनि जस्मिन पेन्ट्सको आम्दानीमा छलाङ, ९ महिनामै कमायो ८७ करोड

काठमाडौं । नेपाल धितोपत्र बोर्डबाट आइपीओ निष्कासनको अनुमति पर्खिरहेको जस्मिन पेन्ट्स लिमिटेडले चालु आर्थिक वर्षको ९ महिनामै ८७ करोड ४० लाख रुपैयाँ आम्दानी गरेको छ। कम्पनीले गत आर्थिक वर्ष (सन् २०२५) मा ८३ करोड ५० लाख रुपैयाँ आम्दानी गरेको थियो । यससँगै कम्पनीले ९ महिनामै गत वर्षको वार्षिक आम्दानीलाई उछिनेको छ ।

कम्पनीको आम्दानी पछिल्ला वर्षहरुमा निरन्तर बढ्दो क्रममा देखिएको छ । सन् २०२४ मा ६७ करोड ७० लाख रुपैयाँ, सन् २०२३ मा ६२ करोड २० लाख रुपैयाँ, सन् २०२२ मा ७४ करोड ६० लाख रुपैयाँ तथा सन् २०२१ मा ६५ करोड ५० लाख रुपैयाँ आम्दानी गरेको रेटिङ एजेन्सी इक्रा नेपालले जनाएको छ ।