बजार घट्दा पनि प्रतिफल पाउन सकिने ‘सर्ट सेलिङ’ प्रणाली छिट्टै लागू गर्दैछौँ: सेबोन अध्यक्ष भट्ट

काठमाडौँ । नेपाल धितोपत्र बोर्ड (सेबोन) का अध्यक्ष डा. गोपालप्रसाद भट्टले देशको पुँजी बजारमा छिट्टै ‘सर्ट सेलिङ’ प्रणाली लागू गर्न लागिएको जानकारी दिएका छन्। बुधबार सङ्घीय संसद्को अर्थ समितिको बैठकमा बोल्दै अध्यक्ष भट्टले सेयर बजार बढ्दा मात्र नभई घट्दा पनि लगानीकर्ताले प्रतिफल लिन सक्ने आधुनिक उपकरणका रूपमा यो व्यवस्था ल्याउन लागिएको स्पष्ट पारे।

नेपालमा सेयर बजार सधैँ बढिरहनुपर्छ भन्ने एकतर्फी र परम्परागत मान्यता रहेको उल्लेख गर्दै उनले संसारको कुनै पनि पूँजीबजार निरन्तर उकालो मात्र लाग्न नसक्ने स्पष्ट पारे। बजार घट्दा धितोपत्र बोर्डमाथि अनावश्यक दबाब दिने र आन्दोलन गर्ने गरिएको प्रति गुनासो गर्दै उनले बोर्डको भूमिका बजारको दिशा निर्धारण गर्ने नभई सबैका लागि निष्पक्ष र समान अवसर (प्लेइङ फिल्ड) सुनिश्चित गर्नु मात्र भएको बताए।