शरीरमा पेट्रोल खन्याएर आत्मदाहको प्रयास गरेका युवा गम्भीर, काठमाडौँ रिफर

काठमाडौँ । रौतहटको गरुडा नगरपालिका–९ गम्हरियाका २८ वर्षीय गौतमकुमार सहनीले शरीरमा पेट्रोल खन्याएर आत्मदाहको प्रयास गरेका छन्। केही समयदेखि मानसिक तनाव तथा डिप्रेसनबाट पीडित सहनीले आफ्नै मोटरसाइकलबाट पेट्रोल निकालेर मङ्गलबार राति आत्मदाहको प्रयास गरेको गरुडा नगरपालिका–९ का वडाध्यक्ष राजेश सहनीले जानकारी दिए।

जिल्ला प्रहरी कार्यालय रौतहटका प्रवक्ता एवं प्रहरी नायब उपरीक्षक वसन्त गौतमका अनुसार घाइते सहनीको घाँटीभन्दा मुनिको करिब ३५ प्रतिशत भाग जलेको छ। स्थानीय चिकित्सकको सल्लाहबमोजिम उनलाई थप उपचारका लागि काठमाडौँतर्फ पठाइएको छ। घाइते युवा डिप्रेसनको समस्यामा रहेको भन्ने प्रारम्भिक जानकारी प्राप्त भएको र घटनाका विषयमा थप अनुसन्धान भइरहेको प्रवक्ता गौतमले बताए।