उपसभामुखको नेतृत्वमा ५ सदस्यीय संसदीय टोली चीन प्रस्थान

काठमाडौँ । चीनको निङ्छी सहरमा आयोजना हुने ‘द फिफ्थ चाइना सिजाङ ट्रान्स’ (हिमालय फोरम फर इन्टरनेसनल कोअपरेसन) मा सहभागी हुन प्रतिनिधिसभाका उपसभामुख रुवी कुमारीको नेतृत्वमा पाँच सदस्यीय प्रतिनिधिमण्डल आज चीन प्रस्थान गरेको छ।

सङ्घीय संसद सचिवालयका अनुसार प्रतिनिधिमण्डल बिहान पौने १ बजे सिचुआन एयरलाइन्समार्फत चीन प्रस्थान गरेको हो। चीन प्रस्थान गर्ने प्रतिनिधिमण्डलमा उपसभामुख रुवी कुमारीका साथै सङ्घीय संसद सचिवालयका सचिव डा. रोजनाथ पाण्डे, उपसचिव विमला घिमिरे, उपसचिव नागेन्द्र चौधरी र कम्प्युटर प्रोग्रामर अनिशा ढकाल छन् ।