नेकपाले भन्यो– सस्तो लोकप्रियता र प्रचारमुखी गतिविधिले देश बन्दैन

काठमाडौँ । नेपाली कम्युनिस्ट पार्टीले सस्तो लोकप्रियता र प्रचारमुखी गतिविधिले देश नबन्ने भन्दै राज्यका संयन्त्र र संस्थाहरूलाई बलियो बनाउनुपर्ने बताएको छ । प्रतिनिधिसभाको बुधवारको बैठकमा धारणा राख्दै पार्टीका सांसद महेन्द्रबहादुर शाहीले राजनीतिक दल र नेतृत्वले क्षणिक प्रचारबाजीभन्दा जनताका वास्तविक र दीर्घकालीन आवश्यकता पूरा गर्नेतर्फ ध्यान केन्द्रित गर्नुपर्ने बताए ।

सांसद शाहीले प्रधानमन्त्री बालेन्द्र शाहले नेपाल–भारत सीमाका विषयमा दिएको अभिव्यक्तिका सन्दर्भमा सरकारको ध्यानाकर्षण गराए । राष्ट्रिय हित र सार्वभौमिकतासँग जोडिएका यस्ता गम्भीर विषयमा सरकार संसद्मा मौन बस्न नमिल्ने भन्दै उनले यसबारे स्पष्ट धारणा सार्वजनिक गर्न माग गरे । सरकारले यस विषयमा स्पष्ट नपारेसम्म प्रतिपक्षको तर्फबाट विरोध जारी रहने उनले स्पष्ट पारे ।