एआई नियमनका लागि नयाँ कानुन ल्याउने तयारीमा अष्ट्रेलिया

काठमाडौं । अष्ट्रेलियाले कृत्रिम बौद्धिकता (एआई) को सुरक्षित, पारदर्शी र जिम्मेवार प्रयोग सुनिश्चित गर्न नयाँ कानुनी व्यवस्था ल्याउने तयारी गरेको छ । प्रधानमन्त्री एन्थोनी अल्बानिजले सरकारको नीति तथा कार्यक्रम प्रस्तुत गर्दै आगामी वर्ष एआई नियमनसम्बन्धी विधेयक संसदमा दर्ता गरिने जानकारी दिएका हुन् ।

प्रधानमन्त्री अल्बानिजका अनुसार एआई प्रविधिप्रति जनविश्वास बढाउने, राष्ट्रिय सुरक्षाको संरक्षण गर्ने तथा सिर्जनात्मक क्षेत्रको बौद्धिक सम्पत्ति अधिकार सुरक्षित गर्ने उद्देश्यले नयाँ कानुन तयार पार्न लागिएको हो । यसका लागि संघीय सरकार, राज्य सरकार र विभिन्न सरोकारवाला निकायबीच विस्तृत परामर्श गरिने उनले बताए ।