थुनामा रहेका पूर्वउपप्रधानमन्त्री रायमाझीसहितका प्रतिवादीले बाहिर बसेर मुद्दा लड्ने सुविधा पाउँछन् ?

काठमाडौँ । काठमाडौँ जिल्ला अदालतले नक्कली भुटानी शरणार्थी प्रकरणमा नौ जनालाई राज्यविरुद्धको कसुरमा समेत दोषी ठहर गरेको छ । न्यायाधीश तेजबहादुर खड्काको इजलासले पूर्वउपप्रधानमन्त्री टोपबहादुर रायमाझीसहित केशवप्रसाद दुलाल, सानु भण्डारी, सागर राई, सन्देश शर्मा, डा. इन्द्रजित राई, विक्रम भन्ने गोविन्द कुमार चौधरी, आङटावा शेर्पा र टेकनारायण पाण्डेलाई संगठित रूपमा ठगी गरेको कसुरका साथै राज्यविरुद्धको कसुर तथा एकीकृत कसुर गरेको ठहर गरेको छ ।

कसुरदार ठहर भएकामध्ये सर्वोच्च अदालतको आदेशमा २०८१ वैशाख १३ मा गोविन्द कुमार चौधरी र आङटावा शेर्पा धरौटी बुझाएर थुना बाहिर छन् । राज्यविरुद्धको कसुरदार ठहर भएका ९ जनालाई नै जिल्ला अदालतले एकीकृत कसुर अन्तर्गत ४ वर्ष कैद र ४० हजार जरिबाना हुने फैसला सुनाएको छ ।