किभमा रुसको मिसाइल र ड्रोन आक्रमण  : आठ जनाको मृत्यु, पोल्याण्डद्वारा लडाकु विमान परिचालन

एजेन्सी । रुसी सेनाले युक्रेनको राजधानी किभमा रातभर भीषण ड्रोन तथा मिसाइल आक्रमण गर्दा कम्तीमा आठ जना सर्वसाधारणको मृत्यु भएको छ। युक्रेनी राष्ट्रपति भ्लोदिमिर जेलेन्स्कीले रुसले व्यापक आक्रमणको तयारी गरिरहेको चेतावनी दिएको केही घण्टामै किभका विभिन्न क्षेत्रहरूमा शक्तिशाली विस्फोट हरू भएका हुन्।

आक्रमणका कारण किभका थुप्रै आवासीय भवनहरूमा गम्भीर क्षति पुगेपछि कैयौँ बस्तीहरू खाली गराइएको छ। किभको सैन्य प्रशासनका प्रमुख तैमुर त्काचेन्कोका अनुसार आक्रमणमा परी आठ जनाको ज्यान जानुका साथै बालबालिकासहित २५ जना घाइते भएका छन्। राजधानीका विभिन्न स्थानमा आगलागीका घटना भएका छन् भने एउटा एम्बुलेन्स स्टेशनमा क्षति पुग्दा एक जना गम्भीर घाइते भएका छन्। विगत दुई साताभन्दा बढीको अवधिमा रुसले युक्रेनमाथि गरेको यो नै पहिलो ठूलो परिमाणको हवाई आक्रमण हो।