रास्वपामा महामन्त्रीका आकांक्षीले धमाधम उम्मेदवारी फिर्ता लिए

काठमाडौँ — रास्वपा महामन्त्रीका आकांक्षीहरूले धमाधम उम्मेदवारी फिर्तालाई अर्को उम्मेदवार समर्थन जनाएपछि मनिष झाले आलोकाँचो राजनीति गर्न नहुने प्रतिक्रिया दिएका छन् । महामन्त्रीका उम्मेदवार रहेका झाले पत्रकारहरूसँग संक्षिप्त प्रतिक्रिया दिँदै भने, 'परिणाम जेसुकै होस मेरो उम्मेदवारी कायम छ ।'

महामन्त्रीमा सबैभन्दा पहिले उम्मेदवारी आफैंले घोषणा गरेको उल्लेख गर्दै उनले भने, 'यति आलोकाँचो राजनीति पनि गर्नुहुँदैन । हिजो राति उम्मेदवारी दिने, आज फिर्ता लिने । सशक्त राजनीति गर्न सक्ने आँट भएकाहरू भिडिइरहन्छन्, परिणाम जेसुकै होस् लागिरहन्छन् । फलानो फोन आएपछि सोचौँला भन्ने राजनीति हुँदैन । सबैभन्दा महामन्त्रीमा उम्मेदवारी गर्ने मै हुँ ।'