एमाले सांसद बरालले भने- सम्पत्ति शुद्धीकरण विधेयक हतारमा र पर्याप्त तयारीबिनै ल्याइयो

काठमाडौँ । नेकपा (एमाले) का सांसद गुरु बरालले सरकारले सम्पत्ति शुद्धीकरण (मनि लाउन्डरिङ) निवारण विधेयक पर्याप्त तयारीबिनै हतारमा ल्याएको टिप्पणी गरेका छन्। प्रतिनिधि सभाको बिहीबारको बैठकमा 'सम्पत्ति शुद्धीकरण (मनि लाउन्डरिङ) निवारण (तेस्रो संशोधन) विधेयक, २०८३' माथि संशोधन प्रस्ताव प्रस्तुत गर्दै उनले यस्तो बताएका हुन्।

सांसद बरालले संसद्‌मा विधेयकका कमजोरीहरू औँल्याउँदै प्रस्तावमा कतै महान्यायाधिवक्ताको सिफारिस भनिएको त कतै तीन महले (संशोधन तालिका) मा त्यसलाई हटाइएको उदाहरण दिए। उनले २०६४ सालदेखि कार्यान्वयनमा रहेको यस ऐनका पुराना अनुभव र सिकाइका आधारमा विधेयकलाई परिमार्जित र समृद्ध बनाएर ल्याउनुपर्नेमा सरकारले तथ्यहरूको तोडमोड गरी हतारोमा मस्यौदा पेस गरेको आरोप लगाए।