खगालगाउँमा पहिलो पटक गाडी पुगेपछि स्थानीयमा खुसीयाली

उत्तरी नाम्खा गाउँपालिका–३ को वडा केन्द्र खगालगाउँमा पहिलो पटक गाडी पुगेपछि स्थानीयवासीले खुसीयाली मनाएका छन् । केही दिनअघि निर्माण सम्पन्न भएको सडकमा परीक्षणका रूपमा बोलेरो जिप सफलतापूर्वक पुगेपछि खगालगाउँवासीले खुसी साटासाट गरेका हुन् ।

नाम्खा गाउँपालिकाका छ वडाका केन्द्रमध्ये हालसम्म सडक सञ्जाल नजोडिएको वडा नम्बर ३ को केन्द्र खगालगाउँमा पहिलो पटक बोलेरो जिप पुगेपछि स्थानीयले जिप तथा यात्रुलाई खादा लगाएर स्वागत गरेका थिए । वडा अध्यक्ष ग्याम्जो लामाले जीपसहितको टोलीलाई स्वागत गर्दै पुजा समेत गर्नुभएको थियो ।