अख्तियारमा सांसदहरूको हस्तक्षेप: ‘रनिङ फाइल’ देखाउन दबाब दिएपछि समिति बैठकमा लफडा!

विराटनगर : इटहरीमा भएको एउटा संसदीय अनुगमनले संसदीय अधिकार, संवैधानिक निकायको स्वतन्त्रता र अनुसन्धानको गोपनीयताबीचको सम्बन्धलाई लिएर नयाँ बहस जन्माएको छ ।

प्रतिनिधिसभाको राज्य व्यवस्था तथा सुशासन समितिका केही सांसदहरूले अख्तियार दुरुपयोग अनुसन्धान आयोगको इटहरी कार्यालयमा पुगेर अनुसन्धान जारी रहेका फाइल देखाउन दबाब दिएका थिए । सांसदले अनुसन्धानको फाइल हेर्न खोजेपछि उत्पन्न भएको विवाद एक कार्यालयभित्रको घटनामा सीमित रहेन । बरु यसले संसदीय अनुगमनको सीमा कहाँसम्म हुन्छ भन्ने प्रश्न उठाएको छ ।