‘आर्ट फर रिलिफ’ अभियानको सुरुवात

दरबारमार्गस्थित ग्यालरी १०८ ले भोटेकोशी बाढीबाट प्रभावित नागरिकका लागि सहयोग गर्ने उद्देश्यले आह्वान गरेको ‘आर्ट फर रिलिफ’ (राहतका लागि कला) अभियानबाट दुई लाख ८६ हजार रुपियाँ सङ्कलन भएको छ ।

ग्यालरीले सोमबारदेखि आह्वान गरेको सो अभियानमा कलाकारले आआफ्ना सिर्जनासहित सहभागिता जनाएर उक्त रकम सङ्कलन गरेका हुन् । ग्यालरी १०८ का संस्थापक सुगतरत्न शाक्यले यस अभियानमा जोडिन इच्छा राख्ने कलाकारले बुधबारसम्ममा २८ वटा कलाकृति प्रदान गरेको र तीमध्ये ११ वटा बिक्री भएर दुई लाख ८६ हजार रुपियाँ जम्मा भएको जानकारी दिनुभयो । उहाँले अभियानमा अन्य कलाकारले पनि चासो देखाएर आआफ्नो कलाकृति दिने क्रममा रहेको बताउनुभयो ।