किसानको फेरिएको दैनिकी: पहिले किनेर खान्थे, अहिले तरकारी बेचेर कमाउँछन्

म्याग्दी – बेनी नगरपालिका–५ डडुवाकी मनकुमारी भण्डारीले यो याममा प्लास्टिक टनेलमा लगाएको भेडेखुर्सानी (क्याप्सिकम) बिक्री गरेर ५० हजार रुपैयाँ आम्दानी गरिन्। ‘एटुजेड’ कृषि फार्मकी सञ्चालक भण्डारी भेडेखुर्सानीको बिक्री सकिएपछि गोलभेडा र रायोसाग लगाउने तयारीमा छिन्।

बसाइँसराइ, श्रमशक्तिको अभाव, बाँदरको उपद्रव र बढ्दो लागतका कारण परम्परागत खाद्यबाली छाडेर डडुवाका किसान अहिले व्यावसायिक तरकारीखेतीतर्फ आकर्षित भएका छन्। आठ वर्षअघि स्थानीय हराभरा कृषि सहकारी संस्थाको पहलमा कास्की र पर्वतका कृषि फार्म अवलोकन भ्रमण गरेपछि यहाँका किसानको खेती गर्ने शैली फेरिएको हो।