सहकारीलाई प्राधिकरणको नयाँ निर्देशन– सम्पत्तिको घोषणादेखि ठूला लगानीकर्ताको विवरण अनिवार्य पेस गर्नुपर्ने 

काठमाडौं । राष्ट्रिय सहकारी नियमन प्राधिकरणले बचत तथा ऋणको मुख्य कारोबार गर्ने सहकारी संस्थाको नियमनलाई थप प्रभावकारी बनाउन नयाँ निर्देशन जारी गरेको छ । सहकारी ऐन, २०७४ को दफा १०३ ‘ज’ ले दिएको अधिकार प्रयोग गर्दै प्राधिकरणले नियामकीय (दोस्रो संशोधन) मापदण्ड–२०८२ अनुसार आवश्यक विवरण अद्यावधिक तथा पेस गर्न निर्देशन दिएको हो ।

उक्त निर्देशन अनुसार बचत तथा ऋणको मुख्य कारोबार गर्ने सहकारी संस्थाले सम्बन्धित व्यक्तिहरूको विस्तृत पृष्ठभूमि (ड्यु डिलिजेन्स) सम्बन्धी विवरण नियमित रूपमा अद्यावधिक गर्न भनिएको छ । प्रचलित कानुनअनुसार मापदण्ड पालना गरेको स्वघोषणा, नाम, ठेगाना, पारिवारिक विवरण, वास्तविक धनी तथा हिताधिकारीको विवरण र नेपाल वा विदेशमा कुनै कसूरमा संलग्न भए वा नभएको घोषणा र भएको भए सोको विस्तृत विवरण र वर्तमान अवस्था अनिवार्य रूपमा समावेश गर्नुपर्ने व्यवस्था गरिएको छ ।