प्राकृतिक विपद्मा विश्व तेक्वान्दो र कुकिवनको साथ

काठमाडौं : भोटेकोशी नदीमा आएको विनाशकारी बाढीबाट भएको ठूलो मानवीय तथा भौतिक क्षतिप्रति विश्व तेक्वान्दो मुख्यालय कुकिवनले गहिरो दुःख व्यक्त गर्दै नेपालको पीडाप्रति ऐक्यबद्धता जनाएको छ। कुकिवनका अध्यक्ष युन उङ सुकले गत अगस्ट २८ मा नेपाल तेक्वान्दो संघका अध्यक्ष दीपराज गुरुङलाई पठाएको समवेदना पत्रमा रसुवा, नुवाकोट र धादिङमा आएको भीषण बाढीबाट भएको जनधनको क्षतिप्रति दुःख व्यक्त गरेका छन्।

विश्व तेक्वान्दोको सर्वोच्च संस्था कुकिवनले विपद्का कारण ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारप्रति गहिरो समवेदना प्रकट गरेको छ। साथै बाढीबाट प्रभावित समुदायको शीघ्र पुनस्र्थापनाको कामना पनि गरेको छ। कुकिवनले जारी खोज, उद्धार तथा राहतका कार्य अझ प्रभावकारी रूपमा अघि बढाउन पनि नेपाल सरकारसँग माग गरेको छ।