ग्वादालाहारामा दक्षिण कोरिया र चेकियाबीचको रोमाञ्चक भिडन्त

विश्वकप २०२६ अन्तर्गत समूह ‘ए’ को आफ्नो पहिलो खेलमा दक्षिण कोरिया र चेकिया (चेक गणतन्त्र) बिहीबार ग्वादालाहारामा आमनेसामने हुँदैछन् । जहाँ दुवै टोली सुरुवाती अंक जोडेर सुखद सुरुवात गर्ने धुनमा हुनेछन् । आयोजक मेक्सिको र दक्षिण अफ्रिका समेत रहेको यस कठिन समूहबाट नकआउट चरणमा पुग्न शीर्ष दुईमा पर्नु अनिवार्य छ । एसियाली राष्ट्रहरूमध्ये सबैभन्दा धेरै १२ औं पटक विश्वकप खेल्न लागेको दक्षिण कोरियाको यो लगातार ११ औं उपस्थिति हो ।

सन् १९८६ को डेब्युयता ३८ खेलमा मात्र ७ जित निकालेको दक्षिण कोरियाको कप्तानी गरिसकेका प्रशिक्षक होंग म्युंग–बोले यसपटक टोलीको नेतृत्व सम्हाल्दै छन् । एएफसी छनोटमा ११ जित र ५ बराबरीसहित ४० गोल गर्दै अपराजित रहेको कोरियाली टोलीले भर्खरैका मैत्रीपूर्ण खेलहरूमा ट्रिनिडाड एन्ड टोबागोलाई ५–० र एल साल्भाडोरलाई १–० ले हराएर आफ्नो लय बलियो बनाएको छ । कप्तान सन ह्युंग–मिन चा बुम–कुनको ऐतिहासिक गोलको कीर्तिमान बराबरी गर्न मात्र दुई गोल टाढा छन् । जसलाई ह्वांग ही–चान र ली कांग–इन जस्ता खेलाडीले साथ दिनेछन् भने रक्षापंक्ति किम मिन–जेले सम्हाल्नेछन् ।